【明報專訊】運輸及房屋局長陳帆之前話，年輕人買唔到樓，所以轉為買車，畀自己嘅靈魂出走一下，不過本港泊車位數目緊張，買咗車冇位泊都好頭痕。電召汽車平台Uber今年7至8月訪問咗超過1000人，發現三分之二受訪車主每日用超過30分鐘搵泊車位，如果日日都要搵位泊車，全年就嘥咗6日搵位泊車。搵唔到位泊車仲令唔少人「遲大到」，例如有四分之一受訪車主因為搵位泊車而去婚禮遲到。Uber香港區總經理佘雋知（Kenneth）同Emily講，銅鑼灣、中環呢啲港島地方泊車問題好嚴重，因為私家車一年比一年多。